تلہ گنگ/راولپنڈی۔18مارچ(اے پی پی)وزیراعظم محمد شہباز شریف آکھیے جو پوری قوم ملک توں دہشتگردی کوں مکاوݨ کیتے اپݨی فوج دے نال کھڑی اے، شہداء دے ٹٻر پوری قوم دا ماݨ ہین۔ اے ڳالھ انہاں میر علی، شمالی وزیرستان اچ دہشتگرداں نال لڑدے شہید تھیوݨ آلے کیپٹن محمد احمد بدر شہید دے گھر ٹمن (تلہ گنگ )ونڄ تے شہید دے پیو ما اتے ٹٻر کوں پرچاوݨی ݙیندے آکھی۔ انہاں دے نال وفاقی وزیرِ دفاع خواجہ آصف اتے وفاقی وزیرِ اطلاعات و نشریات عطاء اللہ تارڑ وی موجود ہن۔ وزیر اعظم پرچاوݨی ݙیندے آکھیا جو شہید قوم دی دعائیں دے مستحق ہین۔ انہاں کیپٹن احمد بدر شہید، لیفٹیننٹ کرنل سید کاشف علی شہید کیتے فاتحہ پڑھی اتے سوگوار ٹٻر کوں مکاݨ ݙتے جو پوری قوم شہیداں دیاں قربانیاں یاد رکھسی۔ وزیراعظم آکھیا جو شہیداں دے گھر آلیاں اتے ٹٻر دا صبر و حوصلہ ݙیکھ تے میکوں وی حوصلہ ملیے۔ کیپٹن احمد بدر شہید دے والد اپݨے پتر دی بہادری نال لڑدے شہادت کوں عزت دی موت قرار ݙیندے آکھیے جو میں وی اپݨے شہید پتر دے ناں نال سنڄاتا ویساں، اے ملک ہے تاں سب کڄھ اے۔ انہاں اپݨے پتر دے ناں تے سکول ٻݨاوݨ دی حجت کیتی جیندے تے وزیراعظم تیکھے عمل کرݨ دا یقین ݙیوائے۔ وزیراعظم لیفٹیننٹ کرنل سید کاشف علی شہید دے گھر وی ڳن اتے مکاݨ ݙتے۔
