لاہور۔8مئی (اے پی پی):پی ڈی ایم اے پنجاب دی طرفوں اڄوکے ہفتے ہیٹ ویو، مینھ وسݨ تے طوفان دا الرٹ جاری کرݙتا ڳئے ۔ترجمان پی ڈی ایم اے موجب 10 مئی تئیں پنجاب اچ اے ݙینھ ویلھے درجہ حرارت اچ 3 توں 5 ڈگری ودھݨ دا امکان اے ۔ ایں دوران پنجاب دے ٻہوں سارے ضلعیں اچ مٹی آلی ہوا گھلݨ/اندھاری تے کھمݨ نال مینھ وس سڳدے۔ 10 تے 11 مئی کوں جنوبی پنجاب دے ضلعیں اچ وی طوفانی مینھ دا امکان اے ۔ پنجاب اچ ضلعی انتظامیہ کوں موسمی صورت حال دا ݙسا ݙتا ڳئے ۔ ڈی جی پی ڈی ایم اے پنجاب علی عرفان کاٹھیا آکھیے جوکھڑی فصلاں کوں طوفان پاروں ضیان تھیوݨ دا ݙر اے ۔ گرمی اتے لُکھ ودھݨ پاروں عوام کوں محتاط رہݨا ہوسی ۔ݙوپہریں کوں کم کرݨ آلے لوک لُکھ توں بچݨ دا اہتمام کرن ۔ انہاں ضلعی انتظامیہ خاص طور تے محکمہ صحت، آبپاشی ، مواصلات، لوکل گورنمنٹ ، لایئو سٹاک ،انفارمیشن ڈیپارٹمنٹ واسا پنجاب پولیس اتے سول ڈیفنس کوں موسمی صورتحال پاروں الرٹ جاری کرݙتے ۔ انہاں شہریاں کوں آکھیے جو آسمانی بجلی توں بچݨ سانڳے محفوظ جاہ تے رہن تے بجلی دی کھمݨ تے طوفانی صورت حال اچ کھلے آسمان تلوں اصلوں نہ ونڄن۔
