اسلام آباد۔26اپریل (اے پی پی) وزیراعظم محمد شہباز شریف کاربن کریڈٹس پالیسی رہنما اصولاں بارے چھیکڑی پالیسی سازی تے صوبیاں نال مشورے کیتے کمیٹی ٻݨاوݨ دی ہدایت ݙیندیں ہوئیں آکھیا جو پاکستان موسمیاتی تبدیلی دے مضر اثرات توں متاثر تھیوݨ آلے ملکاں اچ ساریاں توں اُتے اے۔ وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت پاکستان کونسل برائے موسمیاتی تبدیلی دا تریجھا اجلاس جمعے کوں تھیا۔ اجلاس اچ وفاقی وزراء اسحاق ڈار، احد خان چیمہ، محمد اورنگزیب، سردار اویس خان لغاری، وزیرِ اعظم دی کوآرڈینیٹر برائے موسمیاتی تبدیلی رومینہ خورشید عالم، متعلقہ اعلیٰ حکام اتے سرکاری تے نجی شعبے توں ماہرین شریک تھیے۔ اجلاس اچ وزیرِ اعظم آزاد جموں تے کشمیر، وزیرِاعلیٰ گلگت بلتستان اتے چاروں صوبیاں دے وزراء اعلیٰ وی ویڈیو لنک دے ذریعے شریک تھیے۔ اجلاس اچ چاریں صوبیاں دے وزراء اعلیٰ پالیسی سازی بارے آپݨے آپݨے صوبے دے موقف بارے ݙسیا اتے تجویزاں پیش کیتی۔
