باکو۔15جون(اے پی پی) پاکستان اتے آذربائیجان دی قیادت باہمی ڳانݙھا ٻیا ودھاوݨ تے اتفاق کیتے۔ اے اتفاق وزیراعظم شہباز شریف دی آذر بائیجان دے صدر الہام علیوف نال ملاقات اچ تھئے۔ انہاں اتفاق کیتے جو پاکستان اچ توانائی بحران مکاوݨ کیتے روس دے بعدآذربائیجان نال آندے مہینے توں رعایتی ایل این جی کارگو پاکستان آوݨ شروع تھی ویسن جو آذربائیجان کابینہ ایل این جی پاکستان کوں ݙیوݨ دی منظوری ݙے ݙتی اے۔ وزیراعظم شہباز شریف چھی مہینے توں ایں معاہدے دے تانڳھی ہن۔ آذربائیجان دی قومی ایل این جی کمپنی ہر مہینے رعایتی مل تے ہک ایل این جی کارگو پاکستان بھجویسی۔ ملاقات اچ وزیراعظم شہباز شریف اتے آذربائیجان دے صدر الہام علیوف توانائی، زراعت، ٹرانسپورٹ، دفاع، سرمایہ کاری وتجارت سودھا ٻعے شعبیاں اچ تعاون ودھاوݨ تے اتفاق کیتے۔ آذربائیجان پاکستان دی توانائی لوڑھ پوری کرݨ، تیل وگیس اتے شمسی توانائی دے شعبے اچ ہتھ ونݙیسی۔ پاکستان سٹیٹ آئل(پی ایس او) اتے آذربائیجان دی کمپنی سوکار حکومت توں حکومت دی سطح تے پاکستان دی توانائی دے شعبے اچ ہتھ ونݙیسی۔ آذربائیجان پاکستان توں آوݨ آلے چاول تے درآمدی ڈیوٹی دے استثنیٰ دا مربوط نظام ٻݨآوݨ تے وی اتفاق کیتے۔ آذربائیجان دی آذر ائیرلائن اسلام آباد اتے کراچی کیتے ݙو پروازاں چلیسی۔ ݙوہیں ملک دفاعی تعاون وی ودھیسن۔
