اسلام آباد۔13اپریل(اے پی پی) حکومت اچ شامل اتحادی جماعتاں آکھیے پورے ملک دی وکلا برادری دے مطالبے تے عمل کریندے ہوئیں پارلیمان سپریم کورٹ پروسیجر اینڈ پریکٹس ٻل 2023 منظور کیتے ،قانون سازی دا عمل مکمل تھیوݨ تے ایندے نفاذ توں پہلے سماعت کیتے مقرر کرݨ دا اقدام مسترد کریندوں ،آئین پاکستان دی روشنی اچ پارلیمان دے اختیار تے کوئی سمجھوتہ نہ کیتا ویسی ۔ حکومت اچ شامل جماعتاں دی طرفوں خمیس کوں جاری مشترکہ اعلامیہ اچ آکھیا ڳئے جو ایں نوعیت دا اقدام پاکستان تے عدالت دی تاریخ اچ ایں توں پہلے کݙاہیں وی ݙیکھݨ اچ نی آیا ۔ اے ملک دی اعلیٰ اعلی ترین عدالت دی ساکھ کوں متاثر کرݨ تے انصاف دے آئینی عمل کوں بے معنی کرݨ دے مترادف اے۔ اے بینچ بذات خود سپریم کورٹ دی تقسیم دا منہ ٻولیندا ثبوت اے جیں توں حکومت اچ شامل جماعتاں دے پہلے بیان کیتے ڳئے موقف دی ھک واری ول تائید تھئی اے ۔ اعلامیے موجب خود سپریم کورٹ دے معزز جج صاحبان اپݨے فیصلیں اچ ‘ون مین شو’، متعصبانہ و آمرانہ طرز عمل اتے مخصوص بینچاں دی تشکیل تے اعتراضات دا برملا اظہار کر چکیوں ۔ اعلامیہ اچ آکھیا ڳئے جو 8 رکنی بینچ دی تشکیل توں عدالت عظمیٰ دے انہاں معزز جج صاحبان دے فیصلیں اچ بیان کیتے ڳئے حقائق مزید واضح تھی تے سامݨے آچکن۔ پاکستان ھک وفاق اے، ایں حقیقت کوں نظر انداز کرتے ݙوہیں چھوٹے صوبوں یعنی بلوچستان تے خیبرپختونخوا توں کوئی جج بینچ اچ شامل نہ کرݨ وی افسوسناک اے۔ حکومت اچ شامل جماعتاں ایں اقدام کوں پارلیمان تے ایندے اختیار نال متصادم تصور کریندن جیں دی بھرپور مزاحمت کیتی ویسی۔
