اسلام آباد۔27دسمبر(اے پی پی) ترجمان قومی اسمبلی ایندی تصدیق کیتی اے جو پاکستان تحریک انصاف دی طرفوں سپیکر قومی اسمبلی راجہ پرویز اشرف نال با ضابطہ طور تے رابطہ کیتا ڳئے جیں اچ ملاقات دی استدعا کیتی ڳئی اے ۔ قومی اسمبلی سیکرٹریٹ موجب سپیکر قومی اسمبلی جیڑھے جو ایں ویلھے شہید محترمہ بینظیر بھٹو دی 15 ویں برسی دے سلسلے اچ گڑھی خدا بخش اچ موجود ہن نال ٹیلی فون تے پی ٹی آئی دے قومی اسمبلی اچ سابق چیف ویب ملک عامر ڈوگر رابطہ کیتے تے انہاں کوں ݙسائے جو پی ٹی آئی دا ھک وفد جیڑھا جو انہاں سودھے شاہ محمود قریشی ، پرویز خٹک تے خجھ ٻئے پی ٹی آئی رہنماواں تے مشتمل ہوسی ۔سپیکر قومی اسمبلی نال ملاقات کرݨ چاہندے تاں جو پی ٹی آئی ممبران دے استعفیں تے ڳالھ کیتی ونڄ سڳے ۔ پی ٹی آئی دی طرفوں اے وی ݙسایا ڳعے جو اگرچہ پہلے جماعت دا فیصلہ ہئی جو پی ٹی آئی دے سبھے 124ممبران اکھٹے سپیکر دے سامݨے پیش تھیسن لیکن بعد اچ ھک نمائندہ وفد بھیڄݨ تے اتفاق تھئے ۔سپیکر قومی اسمبلی راجہ پرویز اشرف پی ٹی آئی رہنماواں دی طرفوں رابطہ کرݨ دا خیر مقدم کیتے تے ایں امر دا اظہار کیتے جو سیاست اچ دروازے بند نی کیتے ویندے تے سیاست داناں اچ رابطے رہݨے چاہیدن لیکن ایندے نال نال سپیکر انہاں کوں آکھیے جو استعفیں دی تصدیق دے معاملے اچ آئین پاکستان اتے قومی اسمبلی دے ضوابطہ کار اچ واضح طریقہ کار موجود اے تے ایں سلسلے اچ سپیکر نہ صرف شاہ محمود قریشی بلکہ سارے پی ٹی آئی ممبران کوں تفصیلی خط بھیڄ ݙتن ۔ انہاں آکھیے استعفیں بارے فیصلہ سختی نال ایں دائر کار اچ رہندے ہوئیں کیتا ویسی ۔ قومی اسمبلی اچ پی ٹی ائی دے سابق چیف ویب ملک عامر ڈوگر سپیکر دا شکریہ ادا کیتا تے اے طے پاتے جو سپیکر دی گڑھی خدا بخش توں واپسی تے پی ٹی آئی دے وفد نال ملاقات تھیسی ۔
