اسلام آباد۔1جولائی (اے پی پی):وفاقی وزیر خزانہ مفتاح اسماعیل آکھیے جو ایف بی آر گزریل سال دی نسبت 45 فیصد ودھ ٹیکس کٹھا کیتا ، ہدف پورا کرݨ کیتے حکومت کوئی ایڈوانس ٹیکس نی لاتا ،جون اچ 39ارب روپے دے ریفنڈ جاری کیتے ڳئے ،پچھلے مہینے 763ارب روپے دا ٹیکس کٹھا کیتے،مالی سال ݙو ہزار 2021-22 دی چھیکڑی سہ ماہی دے دوران 1741ارب دے ٹیکس جمع کیتے۔ ایف بی آر جیڑھا سوچیا ہئی او کرتے ݙکھائے انکم ٹیکس دے کلیمز سارے کلیئر کرݙتے ڳئن۔ اے ڳالھ انہاں جمعہ کوں چیئرمین ایف بی آر عاصم احمد دے رلے پریس کانفرنس اچ آکھی۔ وفاقی وزیر خزانہ آکھیے اساں پچھلے سال دی نسبت 45فیصد ودھ ٹیکس کٹھے کیتن، ایف بی آر ٹیکس دی مد اچ 700 ارب توں ودھ روپے جمع کیتے اساں سابق دور توں ودھ ٹیکس جمع کیتے ، انہاں آکھیے ایں جون اچ 379 ارب روپے انکم ٹیکس دی مد اچ ڳھدا تے ھک روپیہ وی اساں ایڈوانس ٹیکس نی ڳھدا ، ایف بی آر تاریخی ٹیکس کٹھے کیتے جݙاں جو ھک مہینے اچ 580 ارب روپے دا وصولیاں دا ریکارڈ ہئی ۔انہاں آکھیے حکومت اچ آندے ہی اوکھے فیصلے گھنݨے پئن تے ایندے ہݨ مثبت اثرات آوݨ شروع تھی ڳئن ، آندے چار مہینے اچ اساں انہاں مسئلیں توں نکل تے بہتری دے پاسے ویسوں ۔ انہاں آکھیے عمران خان دی حکومت پٹرولیم مصنوعات دیاں قیمتاں کوں فکس کیتا ہئی جیں توں ملک کوں ضیان آلے پاسے سٹیا ڳیا ، پی ٹی آئی دے معاہدے دے مطابق پٹرولیم مصنوعات تے 7 فیصد ٹیکس لڳݨا ہئی، عمران خان حکومت آئی ایم ایف نال معاہدہ بھنیے تے معیشت کوں ضیان پڄائے۔ آئی ایم ایف نال ڳالھ تھئی اے ، دنیا اچ تیل دیاں قیمتاں ودھ ڳئن اساں کوشش کیتی اے جو لوکاں کوں ودھ توں ودھ ریلیف ݙیوں ، پٹرولیم مصنوعات تے ٹیکس لاوݨ ساݙی مجبوری اے جیڑھا معاہدہ عمران خان کر ڳئے ہن اینکوں اساں بحال کیتے ۔
