اسلام آباد۔26اپریل(اے پی پی):وفاقی وزیر خزانہ و محصولات سینیٹر محمد اسحاق ڈار ملک دی معاشی اتے مالیاتی ترقی اچ سمندر پار پاکستانیاں دی اہمیت کوں اجاگر کریندے ہوئیں سی ڈی اے حکام کوں ہدایت کیتی جو نیلور ہائٹس 1۔ پروجیکٹ دی بیلٹنگ 16 مئی 2023 دی بجائے 8 مئی 2023 توں پہلے مکمل کرائی ونڄے ۔ اے ہدایت انہاں ٻدھ کوں اپݨی زیر صدارت فنانس ڈویژن اچ سی ڈی اے دے سمندر پار پاکستانیاں دے منصوبیں بارے اجلاس اچ ݙتیاں ۔اجلاس اچ وزیر اعظم دے خصوصی مشیر خزانہ طارق باجوہ، وزیر اعظم دے خصوصی مشیر ریونیو طارق پاشا، سیکرٹری خزانہ، چیئرمین سی ڈی اے، ممبر (پلاننگ اینڈ ڈیزائن) سی ڈی اے، اتے فنانس ڈویژن تے سی ڈی اے دے سینئر افسران شریک تھئے ۔ اجلاس اچ سی ڈی اے دی طرفوں بالخصوص سمندر پار پاکستانیاں سانڳے کیتے ڳئے ترقیاتی منصوبیں تے پیش رفت دا جائزہ ڳھدا ڳئے۔اجلاس اچ واضح کیتا ڳئے جو سی ڈی اے سمندر پار پاکستانیاں کیتے قلیل مدتی اتے درمیانی مدت دے رہائشی منصوبے شروع کیتن ۔ ݙسایا ڳئے جو انہاں اچوں ھک ہائوسنگ پراجیکٹ نیلور ہائٹس۔ ون تکمیل دے مرحلے وچ ہے تے 2000 فلیٹس کیتے 81 ملکاں توں 6000 توں ودھ درخواستاں موصول تھئن ۔وزیر خزانہ سینیٹر محمد اسحاق ڈار ملک دی معاشی اتے مالیاتی ترقی اچ سمندر پار پاکستانیاں دی اہمیت تے زور ݙتا تے سی ڈی اے حکام کوں ہدایت کیتی جو سمندر پار پاکستانیاں کیتے ترقیاتی منصوبیں کوں تکھے اڳوں ودھایا ونڄے۔
