بیجنگ۔12اگست (اے پی پی):چین اچ پاکستانی سفارتخانے یوم آزادی دی ڈائمنڈ جوبلی دے سلسلے اچ چین دے سوشل میڈیا پلیٹ فارمز تے 2ݙینھ وار اچ 4منی ڈاکومنٹریز جاری کیتن۔چینی ویب سائٹ چائنا اکنامک نیٹ دی رپورٹ موجب تقریباً 2منٹ دے مختصر دورانیے تے مبنی ڈاکومنٹریز چین دے 3معروف سوشل میڈیا پلیٹ فارمز کوئیشو، دویین اتے ویبو تے ݙکھائیاں ڳئن جنہں دے 3کلپس چینی شہریاں کوں بھاݨن ۔ ڈاکو منٹریزاچ پاکستانی کھاݨے، دستکاری، تہواراں تے فن تعمیر، تے ہتھ نال بݨیاں نایاب چیزاں ، باسمتی چاول توں گھن تے قالین اتے پاکستان دے قومی جانور مارخور تئیں ساریاں آرٹسٹک چیزاں ݙکھائیاں ڳئن ۔ سوشل میڈیا تے ھک صارف آکھیے جو پاکستانی کھاݨے ݙیکھ تے منہ اچ پاݨی آڳئے ، جݙاں کورونا وائرس دی وبا مک ویسی او پاکستان ویسن ھک ٻئے صارف آکھیے جو اساں اے دستکاری مصنوعات کتھوں گھن سڳدوں ایندا لنک ݙتا ونڄے ، چین اچ پاکستانی سفارتخانے جاری بیان اچ ݙسایا جو جشن آزادی دی گولڈن جوبلی دے سلسلے اچ 7منی ڈاکو منٹریزجاری کریسی جنہاں اچ 4ڈاکومنٹریز جاری کر ݙتیاں ڳئن جݙاں جو ٻیاں 3ڈاکومینٹریز وی ریلیز کیتیاں ویسن ۔ جولائی تئیں چین دے سوشل میڈیا پلیٹ فارمز تے’’ ڈسکور پاکستان‘‘ دی 7 اقساط جاری کرݙتیاں ڳئن ۔
