اسلام آباد۔14جنوری(اے پی پی) مال ڳاݙیاں کوں لڳݨ آلیاں ٻیاں 70 ٻوڳیاں چین توں سنوار 16 جنوری کوں کراچی پڄسن۔ ایں سال 820 ٻوڳیاں اچوں ٻیاں 130 ٻوڳیاں مارچ اچ ریلوے سسٹم اچ رل ویسن۔ ٹرانسفر آف ٹیکنالوجی معاہدے دے تحت باقی 620 ٻوڳیاں پاکستان اچ ٻݨسن۔ ملک اچ مینوفیکچرنگ نال قومی خزانے دا پیسہ بچسی اتے روزگار دے مواقع ودھسن۔ نویاں ٻوڳیاں آوݨ نال ریلوے آمدن اچ سالانہ ݙیݙھ ارب روپے توں ودھارا تھیسی۔ موجودہ ویگنز 60 ٹن وزن نال 80 کلومیٹر فی گھنٹہ دی رفتار نال ٻھڄ سڳدن۔ نویاں ٻوڳیاں اچ 70 ٹن وزن نال 100 کلومیٹر فی گھنٹہ دی رفتار نال چلݨ دی صلاحیت اے۔ جدید ویگنز دے سسٹم اچ رلݨ نال ریلوے توں مال دی ترسیل دا رجحان ودھسی۔
