اسلام آباد۔7جولائی (اے پی پی):وزیراعظم محمد شہباز شریف آکھیے نینگر قوم دا مستقبل اتے خوشحالی دی ضمانت ہن ، دل چاہندے جو ہر ٻال کنے لیپ ٹاپ ہووے تے ھک لکھ نی ھک کروڑ لیپ ٹاپ تقسیم کراں، نینگراں تے سرمایہ کاری توں ودھ تے کجھ کائنی ۔اے ڳالھ انہاں جمعہ کوں جناح کنونشن سنٹر اچ وزیراعظم یوتھ پروگرام دے تحت لیپ ٹاپ تقسیم کرݨ دی تقریب توں خطاب کریندے ہوئیں آکھی اے ۔ وفاقی وزیراطلاعات و نشریات مریم اورنگزیب ، وزیراعظم دے معاون خصوصی شزہ فاطمہ، عطا تارڑ، ملک احمد خان دے علاوہ چیئرمین ایچ ای سی ، اساتذہ، والدین تے طلبا و طالبات وݙی تعداد موجود ہئی ۔وزیراعظم آکھیے جݙاں میں خادم پنجاب ہم تاں نینگراں اچ لکھاں لیپ ٹاپس ونڈیے ۔ پنجاب ایجوکیشن انڈوومنٹ فنڈ توں بے شمار طلباکوں تعلیمی وظائف ݙیوݨ دا سلسلہ شروع کیتا تے انہاں اچوں ٻہوں سارے طلباو طالبات اڄ ڈاکٹرز ، انجینئرزاتے کامیاب پروفیشنلزبݨ چکن تے پاکستان دی خدمت کریندے پئن۔ انہاں آکھیے ھک ݙینھ لاہور اچ ھک ٻالڑی لیپ ٹاپ گھندے ہوئیں میکوں ݙسایا جو اوندے والدین ایں دنیا اچ کائنی لیکن او ڈاکٹر بݨݨ چاہندی اے ۔وزیراعظم آکھیے قوم دے روشن مستقبل دی کنجی نینگراں دے ہتھ اچ اے ۔ میݙادل چاہندے جو ہر نینگر دے ہتھ اچ لیپ ٹاپ ݙیواں ۔کووڈ۔19 دی عالمگیر وبا آئی تاں درسگاہواں بند تھی ڳیاں ۔ اے لیپ ٹاپ ہی ہئی جیڑھا نینگراں کوں زیور تعلیم توں آراستہ کرݨ تے کامیاب پروفیشنل بݨݨ دا ذریعہ بݨیا جدید دور دے تقاضیں دے مطابق قوم دے ہر ٻال جیں کنے علم اے او محنت کرݨ چاہندے اینکوں آپݨا پیٹ کٹ تے لیپ ٹاپ ݙیسوں ۔ اے لیپ ٹاپ لکھاں نینگراں کوں روزگار کماوݨ دے قابل بݨاوݨ دا ذریعہ وی بݨیے ۔ آندے ھک سال اچ نینگراں کوں ھک لکھ لیپ ٹاپ ݙتے ویسن ایں کیتے بجٹ اچ رقم رکھی ڳئی اے ، اے لیپ ٹاپ کہیں سفارش تے نی بلکہ خالصتاً میرٹ تے ملسی۔
