گڏيل قومون- 08 سيپٽمبر (اي پي پي) گڏيل قومن چيو آهي ته عالمي اداري طرفان 2030ع تائين صنفي برابري حاصل ڪرڻ جو هدف مقرر ڪيو ويو هو. هو سڄي دنيا ۾ عورتن سان صحت، تعليم، روزگار ۽ اقتدار جي شعبن ۾ گهرائيءَ تائين فرق ڪرڻ سبب برابري حاصل ڪرڻ ناممڪن ٿي ويو آهي. گڏيل قومن جي اقتصادي ۽ سماجي معاملن بابت شعبي طرفان ڏنل جينڊر سنيپ شاٽ 23ع جي عنوان سان جاري رپورٽ ۾ واضح طور چيو ويو آهي ته عورتن ۽ ڇوڪرين کي اختيار ڏيڻ جي معاملي ۾ دنيا ناڪام رهي آهي. رپورٽ ۾ چيو ويو آهي ته صنفي برابريءَ کي واضح طور مخالفت جو مُنهن ڏسڻو پئجي رهيو آهي، اهم شعبن ۾ مسلسل گهٽ سيڙپڪاري پڻ ان ناڪاميءَ جو هڪ وڏو سبب آهي ۽ ڪيترن ئي شعبن ۾ جيڪا ترقي ٿي هئي اها به پوئتي هلي وئي آهي. رپورٽ ۾ چيو ويو آهي ته صنفي ۽ توليدي صحت تائين اڻبرابري رسائي سياسي نمائندگي، اقتصادي فرق ۽ قانوني تحفظ جي کوٽ ان مسئلن ۾ شامل آهن جيڪي ٺوس ترقيءَ جي رستي کي محدود ڪري رهيا آهن. گڏيل قومن جي نائب سيڪريٽري جنرل ماريا فرانسڪا اسپاٽوليزانو هڪ پريس ڪانفرنس ۾ رپورٽ جاري ڪندي چيو ته صنفي مساوات هڪ مسلسل پري ٿيندڙ هدف بڻجندو پيو وڃي. جنگ سٽيل ۽ غريب علائقن ۾ رهندڙ عورتن جو ذڪر ڪندي هن چيو ته گذريل ڪجهه سالن دوران جيڪا ترقي ٿي هئي اها به هاڻي ختم ٿيندي پئي وڃي. گڏيل قومن عورتن جي حقن جي حوالي سان 17 شعبن ۾ هدف حاصل ڪرڻ جي ڳالهه ڪئي هئي، غربت جي خاتمي کان وٺي تعليم ۽ ماحولياتي تبديليءَ جي شعبن ۾ طئي ڪيل انهن هدفن کي 30ع تائين حاصل ڪرڻ هو. رپورٽ ۾ کين هدف ۾ ٿيل اڳڀرائيءَ جو جائزو ورتو ويو. رپورٽ مطابق تصوير تمام مايوس ڪندڙ آهي ان جو سبب حڪومت طرفان ان جي سستي روي آهي، عورتن جي غربت کي ختم ڪرڻ جي هدف بابت رپورٽ ۾ چيو ويو آهي ته اڄ به دنيا ۾ هر 10 عورتن مان هڪ عورت يعني تقريبن 10.3 سيڪڙو عورتون 2.15 ڊالر ڏهاڙي تي زندگي گذارڻ تي مجبور آهن ۽ جيڪڏهن اهو سلسلو ائين جاري رهيو ته 30ع تائين 8 سيڪڙو عورتون ان سطح تي اچي وينديون، ان ۾ سڀ کان وڌيڪ عورتون صحارا آفريقا ۾ رهن ٿيون، تعليم جي شعبي ۾ ٿيل ترقيءَ جو ذڪر ڪندي رپورٽ ۾ چيو ويو آهي ته عورتن ۽ ڇوڪرين کي تعليمي سهولتون فراهم ڪرڻ ۾ مجموعي طور ترقي ته ٿي آهي پر اڄ به ڪروڙين ڇوڪريون آهن جيڪي ڪڏهن به اسڪول نه ويون آهن، انهن مان اڪثر جهيڙن وارن علائقن ۾ رهن ٿيون. رپورٽ مطابق 23ع تائين پوري دنيا مان 12.9 ڪروڙ ڇوڪريون اسڪول کان ٻاهر ٿي سگهن ٿيون جيڪڏهن اها صورتحال برقرار رهي ته 30ع تائين 11 ڪروڙ ڇوڪريون اهڙيون هونديون جيڪي اسڪول نه وينديون هونديون.
