اسلام آباد۔26جولائی(اے پی پی) کابینہ دی اقتصادی رابطہ کمیٹی گزریل مالی سال رمضان شریف اچ وزیراعظم مفت اٹا سکیم دے تحت یوٹیلٹی سٹورز کارپوریشن دے ذریعے مفت اٹا ݙیوݨ کیتے 985.43 ملین روپے دی منظوری ݙے ݙتی ۔ اقتصادی رابطہ کمیٹی دا اجلاس وفاقی وزیر خزانہ و محصولات سینیٹر اسحق ڈار دی صدات اچ اتھاں منعقد تھیا ۔ اجلاس اچ وفاقی وزیر صنعت و پیداوار مخدوم سید مرتضیٰ محمود، وزیراعظم دے رابطہ کار معیشت و توانائی بلال اظہر کیانی، وفاقی سیکرٹریز اتے ٻئے سینئر افسراں شرکت کیتی۔ اجلاس اچ وزارت صنعت و پیداوار دی طرفوں گزریل مالی سال اچ وزیراعظم مفت اٹا سکیم دے تحت یوٹیلٹی سٹورز کارپوریشن دے ذریعے مستحق شہریاں کوں مفت اٹا ݙیوݨ کیتے سمری پیش کیتی ڳئی ۔ اقتصادی رابطہ کمیٹی ایں مقصد کیتے 985.43 ملین روپے دی منظوری ݙتی ۔ ایں سکیم دا آغاز 18 مارچ 2023 کوں کیتا ڳیا ہئی تے اے سکیم 16 اپریل 2023 تئیں جاری رہی۔
