راولپنڈی ۔28دسمبر(اے پی پی):کورکمانڈر کانفرنس فیصلہ کیتے جو پاک فوج آندے عام انتخابات اچ الیکشن کمیشن کوں مطلوبہ اتے ضروری تعاون ݙیسی۔ کانفرنس دہشتگرد گروپاں دی ہمسایہ ملک اچ محفوظ پناہ گاہواں تے چنتا کریندے پاکستان کوں غیرمستحکم کرݨ آلیاں دشمن قوتاں دے اشارے تے کم کرݨ آلے تے انہاں دی حوصلہ افزائی کرݨ آلے عناصر دے خلاف طاقت نال نمٹݨ دا عزم دوہرائے۔ آئی ایس پی آر آکھیے جو پاک فوج دے اڳواݨ جنرل سید عاصم منیر دی اڳواݨی اچ ݙو ݙیہاڑی 261 ویں کور کمانڈرز کانفرنس جی ایچ کیو راولپنڈی اچ تھئی جیندے اچ شرکا مسلح افواج دے افسراں، جواناں، قانون نافذ کرݨ آلے اداریاں اتے شہریاں سودھا شہداء دی عظیم قربانیاں کوں خراج عقیدت پیش کیتے۔ شرکاء شہدائے پاکستان سودھا ڈیرہ اسماعیل خان حملے دے شہداء کیتے فاتحہ کیتی، بالواسطہ اتے بلاواسطہ خطرات دے خلاف پاکستان دی خود مختاری و علاقائی سالمیت دے دفاع کیتے پورا زور لاوݨ دا عزم کیتا۔ فورم مقبوضہ کشمیر اچ بھارتی فوج ولوں انسانی حقوق دیاں خلاف ورزیاں تے چنتا کریندے معصوم شہریاں دے اغواء، تشدد اتے قتل دی کارروائیاں دی مذمت کیتی۔ کانفرنس اچ خطے دی صورتحال، قومی سلامتی کیتے ودھدے خطرات تے جوابی حکمت عملی تے بریفنگ ݙتی ڳئی۔ فورم افغانستان اچ دہشتگرداں کوں جدید ہتھیار ݙیوݨ کوں پاکستان دی سلامتی کیتے وݙا خطرہ قرار ݙتے۔ کانفرنس فلسطینی عوام نال یکجہتی کریندے غزہ اچ فوری جنگ بندی اتے جاری تنازع دے پرامن حل دا مطالبہ کیتے۔ اجلاس اچ سمگلنگ، منی لانڈرنگ، بجلی چوری اتے ٻعے غیر قانونی سرگرمیاں دے خلاف جاری کارروائیاں دا وی جائزہ ڳھدا۔ کانفرنس اچ آرمی چیف آپریشنز اچ پیشہ ورانہ مہارت دے معیار کوں برقرار رکھݨ، ذہنی و جسمانی شعباں اچ فارمیشنز دی تربیت سانڳے بہترین کارکردگی ݙکھاوݨ تے زور ݙتے۔
