مظفرآباد۔14دسمبر(اے پی پی) نگران وزیراعظم انوار الحق کاکڑ کشمیریاں دی تحریک آزادی دی مکمل حمایت دا اعادہ کریندے ہوئیں آکھیے جو کشمیر پاکستان دی شہ رڳ اے، جیڑھا کجھ مقبوضہ جموں و کشمیر اچ تھیندا پئے پاکستان ایں توں لاتعلق نی رہ سڳدا ، بھارتی سپریم کورٹ کشمیر تے غیر آئینی اتے غیر قانونی فیصلہ ݙتے ، کٹھ پتلی عدالتی فیصلیں نال زمینی حقائق نی بدلیے ونڄ سڳدے، کشمیریاں کوں طاقت دے زور تے زیر کرݨ دا بھارتی خواب کݙاہیں پورا نہ تھیسی ، دنیا کوں ݙساوݨ چاہندوں جو اساں آپݨے مفاد اتے سالمیت تے کوئی سمجھوتہ نہ کریسوں۔ اے ڳالھ انہاں خمیس کوں آزاد جموں و کشمیر قانون ساز اسمبلی توں خطاب اچ آکھی اے ۔ نگران وزیراعظم آکھیے جو ایوان اچ سݙݨ تے شکریہ ادا کرینداں ، پہلا نگران وزیراعظم ہاں جئیں کوں آزاد کشمیر دی قانون ساز اسمبلی اچ خطاب دی دعوت ݙتی ڳئی اے۔ انہاں آکھیے مسئلہ کشمیر اقوام متحدہ اچ پچھلے ست ݙھاکیں توں حل طلب اے ، مقبوضہ کشمیر اچ کشمیریاں تے بھارتی ظلم و بربریت جاری اے، مسئلہ کشمیر عالمی طور تے منیا ڳیا جھیڑا اے ۔ انہاں آکھیے ترائے ݙینھ پہلے بھارتی سپریم کورٹ مسئلہ کشمیر تےغیر قانونی تے غیر آئینی فیصلہ ݙتے، ایجھے کٹھ پتلی عدالتی فیصلیں نال زمینی حقائق بدلیے نی ونڄ سڳدے۔ انہاں آکھیے جو اقوام متحدہ موجب جموں و کشمیر دا مسئلہ صرف اتے صرف کشمیریاں دے استصواب رائے نال حل تھیسی ، بھارتی سپریم کورٹ دا فیصلہ کشمیر تے آپݨے قبضے کوں ڄماوݨ سانڳے ہے ، کشمیریاں بھارتی اقدامات کوں یکسر مسترد کرݙتے انہاں آکھیے پاکستان کشمیریاں دی تحریک آزادی دی مکمل حمایت کریندے ، بھارتی فوج دے پیلٹ گنز دے استعمال توں لکھاں کشمیریاں دی دید ونڄ ڳئی اے ۔ انہاں آکھیے کݙاں تئیں کشمیریاں دی آواز کوں دٻایا ویندا رہسی ؟، کݙاں تئیں بھارت دی ریاستی دہشت گردی جاری رہسی ؟، دنیا کوں اپݨا کردار ادا کریندے ہوئیں مسئلہ کشمیر دے حل سانڳے کوشش کرݨی ہوسی ۔ انہاں آکھیے کجھ مہینے پہلے حریت رہنما یاسین ملک کوں سزائے موت سݨائی ڳئی، ایجھیاں سزاواں صرف کٹھ پتلی عدالتاں ہی سݨا ۔ نگران وزیراعظم آکھیے جو کشمیر پاکستان دی شہ رڳ اے، اساں مسئلہ کشمیر دے منصفانہ حل سانڳے آپݨا کردار ادا کریندے رہ ویسوں ، مسئلہ کشمیر دے حل سانڳے پاکستانی لیڈر شپ کشمیری قیادت دے ہم قدم اے، اساں ٻہوں واری مسئلہ کشمیر سودھے سارے معاملات کوں چنڳے طریقے حل کرݨ دی کوشش کیتی ، بھارت ہمیشہ ہٹ دھرمی دا مظاہرہ کیتے۔ انہاں آکھیے آزادکشمیر اتے گلگت بلتستان بارے بھارتی سیاسی رہنما ہرزہ سرائی کریندے رہندن ، دنیا کوں ݙساوݨ چاہندوں جو اساں آپݨے مفاد تے سالمیت تے کوئی سمجھوتہ نہ کریسوں ۔ بھارت کݙاہیں وی آزاد مبصرین اتے عالمی میڈیا کوں مقبوضہ کشمیر تئیں رسائی نی ݙتی پاکستان کشمیریاں دی سیاسی، اخلاقی اتے سفارتی حمایت جاری رکھیسی ۔ مسئلہ کشمیر حل تھئے بغیر تکمیل پاکستان ممکن کائنی اے میݙی آپݨی زمین آپݨے لوکاں دا مقدمہ اے ، پاکستان مسئلہ کشمیر دا وکیل اے۔
.jpg)
